බුද්ධ රශ්මි ජාතික වෙසක් කලාපය අග්‍රාමාත්‍යතුමාගේ සුරතින් විවෘතවෙයි

කොළඹ හුණුපිටිය ගංඟාරාම විහාරස්ථානයේ බුද්ධ රශ්මි ජාතික වෙසක් කලාපය බුද්ධශාසන, ආගමික හා සංස්කෘතික කටයුතු අමාත්‍ය, ගරු අග්‍රාමාත්‍ය මහින්ද රාජපක්ෂ මහතාගේ සුරතින් අද (26) දින පස්වරුවේ විවෘත විය.

ගංඟාරාම විහාරස්ථානයට පැමිණි අග්‍රාමාත්‍යතුමා සහ ආර්යාව ආගමිකවතාවත්වල නිරතවීමෙන් අනතුරුව පිරිවෙන් අධ්‍යාපනය ලබන සාමණේරවරු 100කට අධ්‍යාපන ශිෂ්‍යත්ව ප්‍රදානය කිරීමේ වැඩසටහනට ද එක්වූහ.

මෙහිදී “සාමණේර රැකවරණ” ශිෂ්‍යත්ව ප්‍රදානය සංකේතවත් කරමින් අග්‍රාමාත්‍යතුමා සාමණේර හිමිනමකට ශිෂ්‍යත්වයක් ප්‍රදානය කළේය. අග්‍රාමාත්‍ය ආර්යා ශිරන්ති රාජපක්ෂ මහත්මිය ද මෙම උතුම් කාර්යය හා එක්වූවාය.

ගංඟාරාම විහාරාධිකාරී ආචාර්ය කිරින්දේ අස්සජි ස්වාමීන්වහන්සේ මෙහිදී අනුශාසනාවක් පැවැත්වූහ. වෙසක් මංගල්‍යයේ අරුත් පැහැදිලි කළ උන්වහන්සේ කොවිඩ්-19 වසංගතයේ භයානකකම පෙන්වා දෙමින් මෙවර බුද්ධ රශ්මි ජාතික වෙසක් කලාපය සංවිධානය කළ ද ජනතාවට එය නැරඹීමට පැමිණිය නොහැකි බව දැනුම් දුන්හ.

ඉන් අනතුරුව අග්‍රාමාත්‍යතුමා ගංඟාරාම සීමා මාලකය අසලදී බුද්ධ රශ්මි ජාතික වෙසක් කලාපය නිල වශයෙන් විවෘත කළේය.

අමෙරිකා එක්සත් ජනපදයේ ප්‍රධාන සංඝනායක වල්පොල පියනන්ද නාහිමි, මාතර හම්බන්තොට දෙදිසාවේ ප්‍රධාන සංඝනායක, මාතර හිත්තැටිය රජමහ විහාරය සහ කොට්ටාව මාලපල්ල ශ්‍රී සුදර්ශනාරාම අධිපති සහ හිටපු බස්නාහිර පළාත් පිරිවෙන් අධ්‍යාපන අධ්‍යක්ෂ රාජකීය පණ්ඩිත අග්‍රහැර කස්සප නාහිමි ඇතුළු මහා සංඝරත්නය මෙම අවස්ථාවට වැඩමකළ වදාළහ.

අග්‍රාමාත්‍යතුමා වෙසක් පුන් පොහෝ දින “අමාදම් සිසිලස-210” වැන්නට එක්වෙයි

සෑම පුන් පොහෝ දිනකම ගරු අග්‍රාමාත්‍ය මහින්ද රාජපක්ෂ මහතාගේ සංකල්පයකට අනුව පවත්වන “අමාදම් සිසිලස” ධර්ම දේශනා මාලාවේ 210 වැන්න වෙසක් පුන් පොහොය යෙදෙන අද (26) දිනයේ අරලියගහ මන්දිරයේ දී පැවැත්විණි.

පළමුව අග්‍රාමාත්‍යතුමා, ආර්යාව ඇතුළු පිරිස අරලියගහ මන්දිර පරිශ්‍රයේ පිහිටි බෝධීන් වහන්සේට මල් පහන් සුවඳ දුම් පූජා කොට ආගමික වතාවත්වල නිරත වූහ.

අනතුරුව ධර්ම දේශනාව සඳහා වැඩම කළ අමරපුර සිරි සුමන විහාර පාර්ශ්වයේ මහනායක පන්නිපිටිය ශ්‍රී දෙව්රම් වෙහෙර නිර්මාතෘ ආචාර්ය කොළොන්නාවේ සිරි සුමංගල මහනායක  ස්වාමීන්වහන්සේට  අග්‍රාමාත්‍ය ආර්යා ශීරන්ති රාජපක්ෂ මහත්මිය දැහැත් වට්ටියක් පූජා කරමින් ධර්ම දේශනාවට ආරාධනා කළාය.

ප්‍රඥාවන්ත දැහැමි ජන සමාජයක් උදෙසා බුදු දහමේ සිසිලස බෙදා දීමේ අරමුණ පෙරදැරිව සෑම පුන් පොහෝ දිනකම පවත්වන “අමාදම් සිසිලස” ධර්ම දේශනා මාලාවේ 210 වැන්න පින්බර වෙසක් පොහොය දිනයේ වැදගත්කම  සහ මෙම ජිවන දිවියේ අනිත්‍යතාව පෙන්වා දෙමින් ධර්ම කරුණු සාකච්ඡා කෙරිණි.‍

අදට වසර 2565 කට පෙර පිරිනිවන් පෑ සුගත තතාගථ බුදුරජාණන් වහන්සේ ඔබේ සිත තුල බුදු කුටියක් කරගන්නැයි සිරි සුමංගල නාහිමියෝ සමස්ත ලෝක වාසී බෞද්ධ ජනතාවගෙන් මෙහි දී ඉල්ලා සිටියහ.

වෛරය, ක්‍රෝධය, ඊර්ෂියාව තුරන් කරගෙන ජීවත්විය යුතු බව පෙන්වා දුන් මහ නාහිමියෝ වසංගත තත්ත්වය තමන්ගෙ දරුවගෙ මරණයට මල්මිටක් තැබීමටවත් අවසර නොමැති තැනකට පත්කිරීමෙන් පෙන්වා දෙන්නේ මේ ලෝකය මායාවක් මිරිඟුවක් බව යැයි දේශනා කළහ.

සෞඛ්‍ය මාර්ගෝපදේශයන්ට යටත්ව පැවති “අමාදම් සිසිලස” 210 ධර්ම දේශනාවට අග්‍රාමාත්‍ය මහින්ද රාජපක්ෂ මහතා ප්‍රමුඛ අග්‍රාමාත්‍ය ආර්යා ශිරන්ති රාජපක්ෂ මහත්මිය, රාජ්‍ය අමාත්‍ය අජිත් නිවාඩ් කබ්රාල් මහතා සහ පවුලේ සාමාජිකයෝ කිහිපදෙනෙක් එක්ව සිටියහ.

 

වෙසක් උත්සවය නිමිත්තෙන් හෙට සහ අනිද්දා සුරා සැල් හා මස් මාංශ අලෙවි සැල් වසා දමන්නැයි අග්‍රාමාත්‍යතුමා නියෝග කරයි

වෙසක් උත්සවය නිමිත්තෙන් හෙට (26) සහ අනිද්දා (27) දිවයින පුරා පිහිටි සියලුම සුරාසල් සහ මස් මාංශ අලෙවි සැල් වසා දමන්නැයි බුද්ධශාසන, ආගමික හා සංස්කෘතික කටයුතු අමාත්‍යවරයා වශයෙන් ගරු අග්‍රාමාත්‍ය මහින්ද රාජපක්ෂ මහතා නියෝග කර තිබේ.

ඒ අනුව 26 හා 27 දෙදින සියලුම සුරා සැල්,සතුන් මරණ ස්ථාන, මස් මාංශ අලෙවි සැල් වසා දැමිය යුතු අතර සුපිරි වෙළඳ සැල් ඔස්සේ මත්පැන් අලෙවිය මෙන්ම මස් මාංශ අලෙවි කිරීම නතර කරන්නැයි අග්‍රාමාත්‍යතුමා දන්වා ඇත.

සංචරණ සීමා කාලයන්ට අදාළව දැනටමත් සුරා සැල් වසා තබන්නැයි රජය විසින් නියෝග කර තිබෙන අතර වෙසක් උත්සවයට සමඟාමීව හෙට සහ අනිද්දා මස් මාංශ අලෙවිය ද මුළුමනින්ම නවතා දැමිය යුතු බව අග්‍රාමාත්‍යතුමා දන්වා සිටියි.

වෙසක් දින පණිවුඩය

සම්බුදුරජාණන් වහන්සේගේ උප්පත්තිය, බුද්ධත්වය සහ පරිනිර්වාණය සිහිගැන්වෙන වෙසක් මංගල්‍යය ලොව පුරා වෙසෙන බෞද්ධ සැමගේ උතුම්ම මංගල්‍යයයි.

බෞද්ධ උරුමයන්ගෙන් සුපෝෂිත ප්‍රෞඩ සංස්කෘතියකට උරුමකම් කියන ශ්‍රී ලාංකේය ජනතාව ලෝකවාසී බෞද්ධයන් සමඟ එක්ව මෙම උතුම් තෙමඟුල බැතියෙන් සමරති.

ආමිස හා ප්‍රතිපත්ති පුජාවන්ට මුල් තැන දෙමින් වෙනදා ඉමහත් හරසරින් සමරන වෙසක් මංගල්‍යය මෙවර සැමරීමට සිදුව ඇත්තේ ලොව පුරා පැතිරයන කොවිඩ් වසංගත තත්ත්වය හමුවේ ය.

ඒ නිසා බෞද්ධ දර්ශනයේ එන ඉගැන්වීම් ප්‍රායෝගිකව වටහා ගැනීමටත් බුදුන්වහන්සේ වඩාත් අගයකොට සැලකූ ප්‍රතිපත්ති පූජාවන්ට නැඹුරුවීමටත් මෙම කාලය වඩාත් යෝග්‍යය වේ.

බුදුරජාණන් වහන්සේ දේශනා කොට වදාළ ශ්‍රී සද්ධර්මය නිවැරදිව අවබෝධ කරගැනීම මෙවන් අභියෝගාත්මක කාලයකට මුහුණදී  ධර්මානුකූලව ජීවත්වීම සඳහා මනා පිටුබලයක් සපයයි.

උත්තරීතර බුදු දහම බෞද්ධයන්ට පමණක් නොව සමස්ත මිනිස් සංහතියටම උරුම වූවකි. එහෙයින් ඉතිහාසය පුරාවට ජාතික හා ආගමික සහජීවනය වැඩිදියුණුවීමට බුදු දහමෙන් අප ලැබූ හික්මීම මහඟු කොට බලපෑ අතර ශ්‍රී ලාංකේය ජාතියක් ලෙස ලොව හමුවේ අභිමානයෙන් නැගී සිටීමට ද එය ඉවහල් විය.

මෙවර ජාතික වෙසක් උත්සවය යාපනය නාගදීප රජ මහා විහාරය කේන්ද්‍ර කරගනිමින් උත්කර්ශවත්ව පැවැත්වීමට නියමිතව තිබුණ ද පවතින වසංගත තත්ත්වය ඊට බාධා පැමිණුවේය.

එසේ වුවද උතුම් වෙසක් දිනය අර්ථවත්ව සැමරීමට වසංගත තත්ත්වය බාධාවක් නොවන අතර ප්‍රතිපත්ති පූජාවන්ට මුල්තැන දී නිවසේ සිට බැති සිතින් උතුම් වෙසක් තෙමඟුල මෙවර  සමරන්නැයි සියලුම ශ්‍රී ලාංකේය බෞද්ධ ජනතාවගෙන් මම ඉල්ලා සිටිමි.

කොවිඩ් වසංගතය මුළු ලොවින්ම තුරන්වී සියලු ජනතාවට පෙර පරිදි නිරෝගීමත්ව ජීවත්වීමට හැකිවේවා ! යැයි මෙම උතුම් වෙසක් දිනයේ ඔබ කරන ප්‍රාර්ථනාවට බුද්ධශාසන, සංස්කෘතික හා ආගමික කටයුතු අමාත්‍යවරයා මෙන්ම අග්‍රාමාත්‍යවරයා වශයෙන් මම ද එක්වෙමි.

සියලු ලෝ සතුනට ඉවසීම දයාව කරුණාව හා මෛත්‍රිය පිරි ශ්‍රී සුබ වෙසක් මංගල්‍යයක් වේවා !

අග්‍රාමාත්‍යතුමා හින්දු සංස්කෘතික අරමුදලට නව සාමාජිකයන් පත්කරයි

බුද්ධශාසන,ආගමික හා සංස්කෘතික කටයුතු අමාත්‍යවරයා වශයෙන් ගරු අග්‍රාමාත්‍ය මහින්ද රාජපක්ෂ මහතා අද (17) දින අරලියගහ මන්දිරයේ දි හින්දු සංස්කෘතික අරමුදලට නව සාමාජිකයන් පත් කළේය.

1985 අංක 31 දරන පාර්ලිමේන්තු පනත යටතේ හින්දු ආගමික හා සංස්කෘතික කටයුතු දිරිමත් කර ප්‍රවර්ධනය කිරීම සඳහා හින්දු සංස්කෘතික අරමුදල ස්ථාපිත කර තිබේ.

මෙම අරමුදලේ නව සභාපතිවරයා ලෙස බුද්ධශාසන, ආගමික හා සංස්කෘතික කටයුතු අමාත්‍යංශයේ ලේකම් මහාචාර්ය කපිල ගුණවර්ධන මහතා පත්කර ඇති අතර හින්දු සංස්කෘතික අරමුදල ඒ මහතා ඇතුළු සාමාජිකයන් අට දෙනෙකුගෙන් යුතු පාලක මණ්ඩලයකින් සමන්විතය.

බුද්ධශාසන, ආගමික හා සංස්කෘතික කටයුතු අමාත්‍යංශ ලේකම් මහාචාර්ය කපිල ගුණවර්ධන මහතා සහ හින්දු ආගමික හා සංස්කෘතික කටයුතු දෙපාර්තමේන්තුවේ අධ්‍යක්ෂ ඒ. උමාමහේෂ්වරන් සහ සහකාර අධ්‍යක්ෂ කේ. හේමලොජිනි මහත්ම මහත්මීන් මෙම අරමුදලට නිල බලයෙන් පත්වේ.

මෙයට අමතරව හිටපු පුනරුත්ථාපන රාජ්‍ය අමාත්‍යාංශයේ ලේකම් ශාන්ති නාවුක්කරසන් මහත්මිය, මයුරපති ශ්‍රී බද්‍රකාලි අම්මාන් දේවාලේ භාරකාර මණ්ඩලයේ සභාපති පී. සුන්දරලිංගම්, ජින්දුපිට්ටි ශ්‍රී සිවසුබ්‍රමනියම් ස්වාමි දේවාලයේ භාරකාර මණ්ඩලයේ ලේකම් ජී.වී. සුබ්‍රමනියම්, ව්‍යවසායක දේශමාන්‍ය දුරේසාමි විග්නේශ්වරන් සහ ඒ.බී.‌ජෙයරාජ් මහත්ම මහත්මියන් අග්‍රාමාත්‍යවරයා විසින් පත්කරන ලදි.

රාමසාන් දින පණිවුඩය

රාමසාන් උපවාස කාලය අවසන් කරමින් ලොව පුරා විසිරී සිටින ඉස්ලාමීය බැතිමතුන් සමඟ එක්ව ඊද්-දුල්-ෆිතර් උත්සවය සමරන ශ්‍රී ලාංකේය මුස්ලිම් ප්‍රජාවට මාගේ සුභාශිංසනය පළ කරමි.

ඉස්‌ලාම් භක්‌තිකයන්ගේ ශුද්ධ වූ ග්‍රන්ථය ලෙස සැළකෙන අල් කුරාණයේ නියම කොට ඇති පරිදි මාසයක් පුරා ඉටුකරන රාමසාන් උපවාසය ආගමික වශයෙන් මෙන්ම අධ්‍යාත්මික වශයෙන් ද ලොවට ගෙනඑන පණිවුඩය ඉතා වැදගත් වේ.

උපවාස කාලයේ දී අන්‍යයන්ගේ කුස ගින්න පිළිබඳව නිවැරදි අදහසක් ඇතිවීම මගින් ඉස්ලාමීය බැතිමතුන් පරිත්‍යාගශීලී සමාජයක් උදෙසා උස් පහත් භේදයකින් තොරව පෙළගැසෙනු ඇති බව මාගේ විශ්වාසයයි.

ආගමානුකූල නිවැරදි ඉගැන්වීම් තුළ ශික්ෂණය ලැබූ ඉස්ලාමීය ජනතාව ඉතිහාසය පුරාවට ශ්‍රී ලාංකේය ජන සමාජය තුළ අනෙකුත් ජාතීන් හා ආගම් සමඟ අන්‍යෝන්‍ය සුහඳත්වයෙන් කටයුතු කර තිබේ.

මෙම විශ්වාසය පළුදු නොකරමින් ඉදිරියට යාම සඳහා ඉස්ලාමීය ජනතාවට තිබෙන අවශ්‍යතාව අප රජයක් ලෙස තේරුම් ගෙන ඇතිබව ද අද වැනි දිනයක සිහිපත් කළ යුතුය.

ලොව පුරා පැතිරයන කොවිඩ් වසංගත තත්ත්වය හේතුවෙන් පසුගිය වසරේ මෙන්ම මේ වසරේ දී ද ඊද්-දුල්-ෆිතර් චාරිත්‍රයන් උත්සව සිරියෙන් සැමරීමට නොහැකිවුව ද මේ හා බැඳී පවතින ආගමික චාරිත්‍රයන් සෞඛ්‍ය මාර්ගෝපදේශ සීමාවන්ට යටත්ව ඉටු කරනු ඇතැයි අපේක්ෂා කරමි.

උපවාස කාලයේ දී සෞඛ්‍ය පිළිවෙත් අනුව නැමදුම් සඳහා පල්ලිවලට විශාල පිරිස් වශයෙන් රැස් නොවීමට වගබලා ගනිමින් නිවෙස්වල සිට ආගමික චාරිත්‍ර ඉටුකිරීමට වගබලාගත් සියලුම ඉස්ලාම් බැතිමතුන්ට මාගේ ප්‍රණාමය හිමිවේ.

සමස්ත ලෝකයම මෙවන් වසංගත අර්බුදයකට මුහුණ දී සිටින කාල වකවානුවක රාමසාන් උපවාසයෙන් අර්ථවත්වන ආගමික සාරධර්ම අන් හැමගේ යහපත සඳහා යොදවන්නැයි මම ඔබ සැමගෙන් ඉල්ලා සිටිමි.

ඔබ සැමට අල්ලාහ් දෙවියන්ගේ ආශිර්වාදය සහිත රෝග බියෙන් තොර සාමය සතුට පිරි ප්‍රීතිමත් ඊද්-දුල්-ෆිතර් උත්සවයක් වේවා !

ජාතික වෙසක් උත්සව සමරු මුද්දර ත්‍රිත්වය අග්‍රාමාත්‍යතුමාට පිළිගන්වයි

ජාතික වෙසක් උත්සවය වෙනුවෙන් නිකුත් කළ සමරු මුද්දර ත්‍රිත්වය, මුල්දින කවරය සහ සිහිවටන පත්‍රිකාව ජනමාධ්‍ය අමාත්‍ය කෙහෙලිය රඹුක්වැල්ල මහතා විසින්  අද (12) දින අරලියග මන්දිරයේ දී ගරු අග්‍රාමාත්‍ය මහින්ද රාජපක්ෂ මහතාට පිළිගන්වන ලදි.

මෙවර ජාතික වෙසක් උත්සවය උතුරු පළාතේ පිහිටි ඓතිහාසික නාගදීප රජ මහා විහාරස්ථානය කේන්ද්‍ර කර ගනිමින් පැවැත්වීමට නියමිතව තිබිණි.

ඒ අනුව මෙවර ජාතික වෙසක් උත්සවයේ සමරු මුද්දර සඳහා ඓතිහාසික වටිනාකමකින් යුතු උතුරු හා නැගෙනහිර පළාත් වල බෞද්ධ සිද්ධස්ථාන වල චිත්‍ර යොදාගෙන තිබේ.

වව්නියාව සපුමල්ගස්කඩ විහාරය, යාපනය කදුරුගොඩ විහාරය සහ වව්නියාව මඩුකන්ද දළදා විහාරයේ කේන්ද්‍ර කර ගනිමින් මුද්දර නිර්මාණ ශිල්පී පාලිත ගුණසිංහ මහතා මෙම සමරු මුද්දර නිර්මාණය කර තිබේ.

රුපියල් දහය, රුපියල් පහළොව  සහ රුපියල් හතළිස් පහ මුදල්  වටිනාකමින් යුතු මුද්දර තුනක් මෙහි දී නිකුත් විය.

මෙම අවස්ථාවට ගංගාරාම විහාරාධිකාරි ආචාර්ය  පූජ්‍ය කිරින්දේ අස්සජි ස්වාමීන් වහන්සේ ඇතුළු මහා සංඝරත්නය, අමාත්‍ය ජී. එල්. පීරිස්, රාජ්‍ය අමාත්‍ය අජිත් නිවාඩ් කබ්රාල්, අග්‍රාමාත්‍ය ලේකම් ගාමිණි සෙනරත්, බුද්ධශාසන ආගමික හා සංස්කෘතික කටයුතු අමාත්‍යංශයේ ලේකම් මහාචාර්ය කපිල ගුණවර්ධන, බෞද්ධ කටයුතු කොමසාරිස් ජනරාල් සුනන්ද කාරියප්පෙරුම, බුද්ධශාසන අමාත්‍යංශයේ  අධ්‍යක්ෂ චම්පිකා කනේරු, තැපැල්පති රංජිත් ආරියරත්න, නියොජ්‍ය තැපැල්පති රාජිත කේ.රණසිංහ යන මහත්ම මහත්මීන් ඇතුළු පිරිසක් සහභාගී වූහ.

“විශ්ව ආශිර්වාද හෝරාව” සර්ව ආගමික වැඩසටහන

බුද්ධශාසන, ආගමික සහ සංක්කෘතික කටයුතු අමාත්‍ය ගරු මහින්ද රාජපක්ෂ මැතිතුමාගේ සංකල්පයකට අනුව, Covid – 19 රෝගය මිහිතලයෙන් දුරුවේවා යන අරමුණ පදනම් කර ගනිමින් සර්ව ආගමික වැඩසටහනක් එළඹෙන සෙනසුරාදා දින (2021.05.08) ප.ව.5.46ට දිවයින පුරා විහිදී ඇති විහාරස්ථාන, හින්දු කෝවිල්, මුස්ලිම් පල්ලි හා කතෝලික දේවස්ථාන තුළ පැවැත්වීමට සූදානම් කර ඇත.

එමෙන්ම, බෞද්ධ විහාරස්ථාන තුළ රතන සූත්‍ර සජ්ඣායනාවත් අනෙකුත් ආගමික සිද්ධස්ථාන තුළ පූජාවන් සහ ප්‍රාර්ථනාවන් සිදු කරනු ලබයි.

මේ සියලු කටයුතු සෞඛ්‍ය අමාත්‍යංශයෙන් නිකුත් කරන ලද සෞඛ්‍ය නීති රීති වලට අනුකූලව පවත්වනු ලබයි.

මෙම වැඩසටහනෙහි සජීව විකාශනය ප.ව. 5.30 සිට 6.30 දක්වා ස්වාධීන රූපවාහිනිය ඔස්සේ විකාශනය කිරීමට සියලු කටයුතු සූදානම් කර ඇත.

එමෙන්ම, අනෙකුත් රූපවාහිනී නාලිකා හා ගුවන් විදුලි මාධ්‍යයන් සඳහා මෙම වැඩසටහනෙහි දර්ශන මෙන්ම හඬ පටද ස්වාධීන රූපවාහිනි නාලිකාව මඟින් ලබා ගත හැක.

(වැඩිදුර විස්තර පහත දුරකථන අංක මඟින් ලබා ගත හැක.)

  • සුදත් රෝහන මහතා - 0777425078 සභාපති - ස්වාධීන රූපවාහිනිය
  • හසන්ත හෙට්ටිආරච්චි මහතා - 0714115256 ක්‍රියාකාරී අධ්‍යක්ෂ - ස්වාධීන රූපවාහිනිය
  • ජනජීව මහතා - 0716856157 ජ්‍යෙෂ්ඨ නිශ්පාදක - ස්වාධීන රූපවාහිනිය

මැයි දින පණිවුඩය

ජාත්‍යන්තර කම්කරු දිනය යෙදෙන අද දිනයේ සමස්ත වැඩ කරන ජනතාවට මා සුබ පැතුම් එක්කරනුයේ ඉමහත් සතුටිනි.

ජාත්‍යන්තර කම්කරු දිනය යෙදෙන අද දිනයේ සමස්ත වැඩ කරන ජනතාවට මා සුබ පැතුම් එක්කරනුයේ ඉමහත් සතුටිනි.

කම්කරු අයිතීන් දිනා ගැනීම වෙනුවෙන් ආරම්භ වූ ලෝක කම්කරු දිනය වැඩ කරන ජනතාවගේ‌ ශ්‍රේෂ්ඨතම දිනයයි.

පොදුවේ තම රටට පමණක් නොව සමස්ත ලෝකයේම අභිවෘද්ධිය උදෙසා කම්කරු ජනතාව කරනු ලබන කැපවීම සෑම කල්හිම ඉතා ප්‍රශංසනීය වේ.

වැඩබිම්වල දහඩිය වගුරවමින් සියලු දෙනාගේ සුබ සිද්ධිය වෙනුවෙන් ඔබ කරනු ලබන මෙහෙවර ඇගයීමට මම මෙය අවස්ථාවක් කරගනිමි.

අප සියලු දෙනා දන්නා පරිදි ජාත්‍යන්තර කම්කරු දිනය වැඩ කරන ජනතාවගේ ශක්තියසහ එකමුතුබව ලොවට විදහපාන දිනයයි.

එසේ වුවද ලොව පුරා පැතිර යන කොවිඩ් වසංගත තත්ත්වය හේතුවෙන් පසුගිය වසරේ මෙන්ම මෙවරද පෙළපාලි හා රැස්වීම්වලින් තොරව ජාත්‍යන්තර කම්කරු දිනය සැමරීමට සිදුව තිබේ. මෙවන් ව්යලවසන අවස්ථාවක දී සෞඛ්‍ය මාර්ගෝපදේශ අනුව යමින් ශ්‍රී ලාංකේය කම්කරු ජනතාව මැයි දිනය අලුත් මුහුණුවරකින් සමරනු ඇතැයි බලාපොරොත්තුවෙමි. කොතරම් දුෂ්කර තත්ත්වයන් හමුවේ වුවත් අපගේ රජයන් කම්කරු ජනතාව වෙනුවෙන් දිය යුතු නිසි ගෞරවය ලබා දුන් බව සිහි පත්කරමි. එමෙන්ම කම්කරු අයිතිවාසිකම් සුරකීම වෙනුවෙන් අප ඇප කැප වුණෙමු.

දෙදහස් විසි එක වර්ෂය සඳහා මා විසින් ඉදිරිපත් කළ අය-වැය ලේඛනයෙන් වතු කම්කරුවන් සඳහා පොරොන්දු වු රුපියල්දහසේ දෛනික වැටුප ලබා දීමට හැකිවීම අප ලැබූ ජයග්‍රහණයකි.

එමෙන්ම කම්කරු ප්රතජාවගේ සුභසාධනය උදෙසා සේවක අර්ථසාධක අරමුදල් පනත, කාර්මික ආරවුල් පනත හා වන්දි ආඥා පනත වැනි කම්කරු පනත් ගණනාවක් යාවත්කාලීන කිරීම ඔස්සේ කම්කරු අයිතීන් සුරකීමට අප රජයට හැකි වීම ඔබට කළ ගෞරවයක් බව සිහිපත් කරමි. ජනහිතකාමි වැඩබිමක් සුරක්ෂිත දේශයක් තේමාවෙන්මෙවර සමරනු ලබන මැයි දිනයේ දී දේශීය ආර්ථිකය නගා සිටුවීමට කම්කරුජනතාව එකාමෙන් අත්වැල් බැඳගනු ඇතැයි මම තරයේ විශ්වාස කරමි.

කොවිඩ් වසංගතය හමුවේ වුවද සමාජ ආර්ථික සංවර්ධනය වෙනුවෙන් දිවා රෑ වෙහෙසෙන ඔබගේ කැපවීම අගය කරන අතර වසංගත තත්ත්වය පාලනය කිරීමට දක්වන දායකත්වය වෙනුවෙන් මාගේ ප්රඔණාමය පුද කරමි.

ලෝකවාසී වැඩකරන සියලු ජනතාවට ජයවේවා!

ගරු අග්‍රාමාත්‍යතුමා “අමාදම් සිසිලස” 209 වැන්නට එක්වෙයි

ගරු අග්‍රාමාත්‍ය මහින්ද රාජපක්ෂ මහතාගේ සංකල්පයකට අනුව සෑම පුන් පොහෝ දිනකම පවත්වන “අමාදම් සිසිලස” ධර්ම දේශනා මාලාවේ 209 වැන්න අද (26) දින අරලියගහ මන්දිරයේ දී පැවැත්විණි.

පළමුව අග්‍රාමාත්‍යතුමා, ආර්යාව ඇතුළු පිරිස ආගමික වතාවත්වල නිරත වූහ. අනතුරුව ධර්ම දේශනාව සඳහා වැඩම කළ කැලණිය විශ්ව විද්‍යාලයට අනුබද්ධ පාලි හා බෞද්ධ අධ්‍යයන පශ්චාත් උපාධි ආයතනයේ අධ්‍යක්ෂ ජ්‍යෙෂ්ඨ මහාචාර්ය පූජ්‍යපාද මැදවච්චියේ ධම්මජෝති නාහිමියන්ට අග්‍රාමාත්‍ය ආර්යා ශිරන්ති රාජපක්ෂ මහත්මිය දැහැත් වට්ටියක් පූජා කරමින් ධර්ම දේශනාවට ආරාධනා කළාය.

ප්‍රඥාවන්ත දැහැමි ජන සමාජයක් උදෙසා බුදු දහමේ සිසිලස බෙදා දීමේ අරමුණ පෙරදැරිව සෑම පුන් පොහෝ දිනකම පවත්වන “අමාදම් සිසිලස” ධර්ම දේශනා මාලාවේ 209 වැන්නේ බක් පුන් පොහොයේ වැදගත්කම සහ ‍චක්කවත්ති සිහනාද සූත්‍රය, කූඨ දන්ත සූත්‍රය සහ ගන්ඨ තීන්දු ජාතකය මූලාශ්‍ර කරගනිමින් යහපත් රාජ්‍ය පාලනයක් පිළිබඳව ධර්ම කරුණු සාකච්ඡා කෙරිණි

සෞඛ්‍ය මාර්ගෝපදේශයන්ට යටත්ව පැවති “අමාදම් සිසිලස” 209 ධර්ම දේශනාවට අග්‍රාමාත්‍ය මහින්ද රාජපක්ෂ මහතා ප්‍රමුඛ අග්‍රාමාත්‍ය ආර්යා ශිරන්ති රාජපක්ෂ මහත්මිය ඇතුළු පවුලේ සමීපතයන් කිහිපදෙනෙක් පමණක් සහභාගී වූහ.

බුද්ධශාසන, ආගමික හා සංස්කෘතික කටයුතු අමාත්‍යංශයේ ලේකම් මහාචාර්ය කපිල ගුණවර්ධන මහතා ද ධර්මය ශ්‍රවණය කිරීමට එක්ව සිටියේය.

Latest Video