ගරු අග්‍රාමාත්‍ය මහින්ද රාජපක්ෂ මහතා ජී20 අන්තර් ආගමික සංසදයේ ආරම්භක සැසිය අමතයි

ආර්ථික, දේශපාලන හා සමාජීය අරමුණු සාක්‍ෂාත් කරගැනීමේ දී බොහෝ සෙයින් අපගේ අනාගතය රඳා පවතිනුයේ එක් ජාතියක් වශයෙන් සිදුවන එකමුතුකම හා සහජීවනය මත බව ගරු අග්‍රාමාත්‍ය මහින්ද රාජපක්ෂ මහතා ජී20 අන්තර් ආගමික සංසදයේ ආරම්භක සැසිය අමතමින් අවධාරණය කරයි.

ඉතාලියේ බොලොඤ්ඤා හි පැවැත්වෙන ජී 20 අන්තර් ආගමික සංසදයේ ආරම්භක දිනය වූ අද (12) දින පළමු සැසිවාරය අමතමින් අග්‍රාමාත්‍යතුමා මේ බව කියා සිටියේය.

ජී 20 රාජ්‍ය නායක සමුළුව ලබන ඔක්තෝම්බර් මස 30-31 දෙදින ඉතාලියේ රෝම අගනුවර දී පැවැත්වීමට නියමිත අතර ඊට සමඟාමීව ජී 20 අන්තර් ආගමික සංසදය (G20 Interfaith Forum) පැවැත්වෙයි.

බුද්ධශාසන, ආගමික හා සංස්කෘතික කටයුතු අමාත්‍යවරයා වශයෙන් අග්‍රාමාත්‍ය මහින්ද රාජපක්ෂ මහතා ජී 20 අන්තර් ආගමික සංසදය ආමන්ත්‍රණය කළේය.

ත්‍රිපිටක සංරක්ෂණ පනත් කෙටුම්පත සම්බන්ධව සියළු දෙනාගේ දැන ගැනීම පිණිසයි

 

ත්‍රිපිටක සංරක්ෂණ පනත් කෙටුම්පත සම්බන්ධව 2021 අගෝස්තු මස 05,06 හා 07 යන තෙදින කොළඹ 07, බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලා පරිශ්‍රයේ ජස්මින් ශාලාවේදී පෙ.ව. 9.00 සිට ප.ව. 4.00 දක්වා පැවැත්වෙන විද්වත් කමිටු රැස්වීමේදී සාකච්ඡා වීමට නියමිත නීති කෙටුම්පත් සම්පාදක විසින් නිකුත් කරන ලද නව කෙටුම්පත මේ සමග ඔබගේ අවධානය පිණිස පළ කර ඇත

මේ සඳහා ඔබගේ නිරීක්ෂණ හා නිර්දේශ ලිඛිතව 2021 අගෝස්තු මස 06 දින පෙ.ව. 9.00 සිට ප.ව. 3.00 දක්වා ශාලාව ඉදිරිපිට සිටින අපගේ නිලධාරීන් වෙත ඉදිරිපත් කළ හැකි අතර ඊට අමතරව This email address is being protected from spambots. You need JavaScript enabled to view it. දරණ අමාත්‍යාංශ විද්‍යුත් තැපැල් ලිපිනයට අගෝස්තු මස 05 වන දිනට පෙර යොමු කළ හැකි බව ද දන්වා සිටිනු ලැබේ.

ලේකම්                 

බුද්ධශාසන ආගමික හා සංස්කෘතික කටයුතු අමාත්‍යාංශය                                                                                                                                                          

 

නව කෙටුම්පත බාගත කරන්න...

බුද්ධශාසන, ආගමික හා සංස්කෘතික කටයුතු අමාත්‍යාංශය ත්‍රිපිටක සංරක්ෂණ පනත

ශ්‍රී සද්ධර්මය සුරක්ෂිත කොට අනාගත පරම්පරාවන්ට උරුම කර දීම සඳහා ත්‍රිපිටක සංරක්ෂණ පනතක් පැනවීම සුදුසු බවට ඉදිරිපත් වී තිබුණු ඉල්ලීම මත ත්‍රිපිටක සංරක්ෂණ පනත් කෙටුම්පතක් සකස් කර ඇත.

මෙය පනතක් ලෙස සම්මත කර ගැනීමට පෙර මේ සම්බන්ධව අතිපූජ්‍ය මහා සංඝරත්නය සහ විද්වත් නිරීක්ෂණ ලබා ගැනීමට තීරණය කර ඇත.

ඒ අනුව 2021.08.05 දින සිට 2021.08.07 දින දක්වා බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලාවේදී විද්වත් කමිටුවක් රැස් වෙන අතර මේ සම්බන්ධව උනන්දුවක් දක්වන බාහිර පාර්ශවයන්ට තම අදහස් එම කමිටුවට ලිඛිතව ඉදිරිපත් කිරීමට අවස්ථාව ලබා දෙනු ලැබේ.

එබැවින් 2021.08.06 දින පෙ.ව. 9.00 සිට ප.ව. 3.00 දක්වා මේ සම්බන්ධව උනන්දුවක් දක්වන පාර්ශවයන් මෙම විද්වත් කමිටුවට තම අදහස් ලිඛිතව ලබා දෙන මෙන් ආරාධනා කරනු ලැබේ.

 

 

ලේකම්

බුද්ධශාසන, ආගමික හා සංස්කෘතික කටයුතු අමාත්‍යාංශය

අංක 135, ශ්‍රීමත් අනගාරික ධර්මපාල මාවත, කොළඹ 07

2021.07.27

 

බුද්ධශාසන, ආගමික හා සංස්කෘතික කටයුතු අමාත්‍යාංශය ආරක්ෂක සේවය, සනීපාරක්ෂක හා පිරිසිඳු කිරීමේ සේවය සඳහා ලංසු ආරාධනය

 බුද්ධශාසන, ආගමික හා සංස්කෘතික  කටයුතු අමාත්‍යාංශය

ආරක්ෂක සේවය, සනීපාරක්ෂක හා පිරිසිඳු කිරීමේ සේවයසඳහා

ලංසු ආරාධනය

  1. කොළඹ 07 ශ්‍රීමත් අනගාරික ධර්මපාල මාවතේ අංක 135, ස්ථානයේ පිහිටි බුද්ධශාසන, ආගමික හා සංස්කෘතික කටයුතු අමාත්‍යාංශයට පහත සේවාවන් ලබා ගැනීම සඳහා අමාත්‍යාංශයේ ලේකම් තැන විසින් යෝග්‍යතා පුර්ණ සුදුසුකම්ලත් ලංසුකරුවන්ට මුද්‍රා තබන ලද ලංසු සඳහා ආරාධනය කරනු ලැබේ.                                                                                                                                                                     ආරක්ෂක සේවය- 2021.09.01 දහවල් 12.00සිට 2022.09.01 දහවල් 12.00දක්වා කාලය සඳහා                                                 සනීපාරක්ෂක හා පිරිසිඳු කිරීමේ සේවය -2021.09.01සිට 2022.08.31දක්වා කාලය සඳහා
  2. ජාතික තරගකාරි මිල ගණන් ක්‍රමය යටතේ මිල ගණන් කැඳවනු ලැබේ.
  3. ලංසු ප්‍රධානය සඳහා පහත දැක්වෙන යෝග්‍යතා පුර්ණ නිර්ණායකයන්ට අනුගත විය යුතුය.

      (අ).  ආරක්ෂක සේවා සඳහා ලංසු ලේඛණ ලබා ගැනීමේ මූලික සුදුසුකම ලෙස,  රාජ්‍ය ආරක්ෂක අමාත්‍යංශයේ ලියාපදිංචි ආයතනයක් විය යුතුයි.

      (ආ) සනීපාරක්ෂක හා පිරිසිඳු කිරීමේ සේවය සඳහා ලංසු ලේඛණ ලබා ගැනීමට වලංගු ලියාපදිංචි  ආයතනයක් විය යුතුයි.

      (ඇ) ලංසු ලේඛණ ඇඟයීමේ දී, ලංසු ලේඛණ තුළ අඩංගු මූලික සුදුසුකම් ඇඟයීමට ලක් වේ.

      (ඈ). පසුගිය වසර 5 තුළ අවමයෙන් රුපියල් මිලියන 05 කට වැඩි වාර්ෂික ආදායමක් අදාළ සේවා සැපයීමෙන් සම්පුර්ණ කොට තිබීම.

 

  1. ආපසු නොගෙවන රු. 2000/= ක ගාස්තුවක් මුදලින් ගෙවා කොළඹ 07, ශ්‍රීමත් අනගාරික ධර්මපාල මාවතේ අංක 135 “දහම්පාය” ස්ථානයේ, බුද්ධශාසන, ආගමික හා සංස්කෘතික කටයුතු අමාත්‍යාංශයයේ ලේකම් වෙත යොමු කරනු ලබන අයඳුම්පතක් මඟින්, මෙයට කැමැත්තක් දක්වන ලංසුකරුවන්ට 07.20 දින සිට 2021.08.09 දින දක්වා සතියේ වැඩ කරන ඕනෑම දිනක පැය 09.00 සිට 3.00 දක්වා, සිංහල භාෂාවෙන් සකස් කරන ලද ලංසු ලියවිලි කට්ටලයක් මිල දී ගත හැකිය.

 

  1. සම්පූර්ණ කරන ලද ලංසු ලියවිලි ඉදිරිපත් කරනු ලබන ලියුම් කවරයේ වම්පස ඉහල කෙලවරේ ආරක්ෂක සේවා සඳහා ලංසු කැඳවීම- 2021 යනුවෙන්ද සනීපාරක්ෂක හා පිරිසිදුකිරීමේ සේවය සඳහා ලංසු කැඳවීම- 2021 යනුවෙන් ද සඳහන් කර 08.10 දින 14.00 පැයට හෝ ඊට පෙර ලැබෙන සේ, මුද්‍රා තබන ලද ලංසු ඉහත සඳහන් ලිපිනයේ බුද්ධශාසන, ආගමික හා සංස්කෘතික කටයුතු අමාත්‍යාංශයේ ලේකම් තැන වෙත ලියාපදිංචි තැපෑලෙන් එවීම හෝ කොළඹ 07, ශ්‍රීමත් අනගාරික ධර්මපාල මාවතේ  අංක 135 “දහම්පාය”  ස්ථානයේ බුද්ධශාසන, ආගමික හා සංස්කෘතික  කටයුතු අමාත්‍යාංශයේ 3වන මහලේ ගිණුම් අංශයේ ඇති ටෙන්ඩර් පෙට්ටියට බහාලීම හෝ කළ හැකි වේ.ප්‍රමාද වී ලැබෙන ලංසු ප්‍රතික්ෂේප කරනු ලැබේ.ලංසු භාරගැනීම අවසන් වු විගස ඒවා විවෘත කරනු ඇත.මෙම ලංසු විවෘත කරන අවස්ථාවට ලංසුකරුවන්ට හෝ ඔවුන්ගේ නියෝජිතයන්ට සහභාගි විය හැකිය.

 

  1. ලංසු ලියවිලි සම්මත ආකෘති යොදා ගනිමින්, මහ බැංකුව විසින් අනුමත කරන ලද වාණිජ බැංකුවකින් ලබාගත් රු. 25,000/= ක කොන්දේසි විරහිත ලංසු ඇපකරයක් හෝ ඒ හා සමාන මුදලකට ලබාගත් බැංකු අණකරයක් හෝ මුදලින් ගෙවන ලද ලංසු ඇපයක් සමග භාරදිය යුතුය. ලංසු භාරගැනීම අවසන් කළ දිනයේ සිට කැලැන්ඩර් දින 90 ක් ඉදිරියට එම ලංසුව වලංගු විය යුතුය.

 

  1. වැඩිමනත් තොරතුරු සදහා කරුණාකර කොළඹ 07 ශ්‍රීමත් අනගාරික ධර්මපාල මාවතේ අංක 135“දහම්පාය” ස්ථානයේ බුද්ධශාසන, ආගමික හා සංස්කෘතික  කටයුතු අමාත්‍යාංශයේ, ප්‍රධාන මූල්‍ය නිළධාරි දුරකථන අංක  011-2307673 හෝ 011- 2307674/94 දිගුව 308 ඇමතීමෙන් ලබාගත හැකිවේ.

 

 

සභාපති                                                                                                                                                    දිනය:2021.07.20

අමාත්‍යංශ ප්‍රසම්පාදන කමිටුව

බුද්ධශාසන, ආගමික හා සංස්කෘතික  කටයුතු අමාත්‍යාංශය “දහම්පාය”,ශ්‍රීමත් අනගාරික ධර්මපාල මාවත,

කොළඹ 07.

ශ්‍රි ලංකා අමරපුර මහා නිකායේ අභිනව උත්තරීතර මහානායක ධූරයට පත්වී වදාළ මහානාහිමිපාණන් වහන්සේට ගෞරවණීය සුභාශිංසන පිරිනමමු

ශ්‍රි ලංකා අමරපුර මහා නිකායේ අභිනව උත්තරීතර මහානායක ධූරයට පත්වී වදාළ රාජගිරිය කලපලුවාව ගෝතම තපෝවනාරාමාධිපති අග්ගමහා පණ්ඩිත අතිපූජ්‍ය දොඩම්පහල චන්ද්‍රසිරි මහානාහිමිපාණන් වහන්සේට ගෞරවණීය සුභාශිංසන පිරිනමමු.

ගරු අග්‍රාමාත්‍යතුමාගේ හජ් දින පණිවුඩය

පරිත්‍යාගය හා සාමූහිකත්වයට මුල්තැන දෙමින් අද දින ඊද් උල් අල්හා හෙවත්  හජ් උත්සවය සමරන ලොව පුරා ඉස්ලාම් බැතිමතුන්ට මාගේ සුබපැතුම් එක් කරමි.

ඉස්ලාම් ආගමේ පදනම වැටී ඇති පංචස්තම්බ වලින් එකක් වන්නේ හජ් වන්දනාවයි.

කායික හා ආර්ථිකමය වශයෙන් හැකියාවක් තිබෙන සෑම ඉස්ලාම් බැතිමතෙක්ම සිය ආයු කාලය තුළ දී එක්වරක් හෝ හජ් වන්දනාවේ නිරතවිය යුතුබව විශ්වාසයයි.

ලොවපුරා විසිරී සිටින ලක්ෂ සංඛ්‍යාත ඉස්ලාම් බැතිමතුන් එකම අරමුණක බැඳී එකම පූජා භූමියකට රැස් ව මනුෂ්‍යත්වයේ අපේක්ෂාව වන සාමූහිකත්වයේ අගය ප්‍රාර්ථනා කරනුයේ හජ් වන්දනාව තුළිනි.

ඒ අනුව ගත් කළ සමාජීය සහජීවනයේ මහිමය ලෝක ප්‍රජාවට සන්නිවේදනය කරන ප්‍රමුඛ ආගමික උත්සවයක් ලෙස හජ් උත්සවය හැඳින්විය හැකිය.

කොවිඩ් - 19 වසංගතය හේතුවෙන් පසුගිය වර්ෂයේ මෙන්ම මෙවරත් ඉස්ලාම් බැතිමතුන්ට මක්කම ගොස් හජ් වන්දනාවේ යෙදීමට ඇති ඉඩකඩ ඇහිරී තිබේ.

සාමය, සහෝදරත්වය සමානාත්මතාවය අගය කරන හජ් දින සුබ ප්‍රාර්ථනාවන්ට එමගින් බාධාවක් නොවන බව මාගේ විශ්වාසයයි.

දේවස්ථානවල සාමූහිකව රැස්වී සිදුකරන සම්ප්‍රදායික ආගමික කටයුතු මෙවර  සිදු නොකරන ලෙසට සෞඛ්‍ය අංශ විසින් ලබා දී ඇති උපදෙස් වලට අනුගත වෙමින් කොවිඩ්-19 වසංගතය ලොවින් තුරන් කරන්නට අප සැම එක්ව තිර අධිෂ්ඨානයෙන් කටයුතු කළ යුතුය.

ඉස්ලාමීය මඟපෙන්වීම් ද නිසි අයුරින් අනුගමනය කරමින් ලෝකවාසී ජනතාවම කෙටි කලක් ඇතුළත කොවිඩ් වසංගතයෙන් මුදා දෙන්නැයි අද වැනි උතුම් දිනෙක අල්ලාහ් දෙවියන්ගෙන් අයැද සිටිමු.

ඔබගේ සියලු යහක්‍රියා අල්ලාහ් දෙවියන් විසින් පිළිගනිත්වා යන්න අපගේ ද ප්‍රාර්ථනයයි.

විවිධ ජාතීන් අතර සුහඳත්වය සහ සංහිදියාව සිහිපත්කරන හජ් උත්සවයේ පරමාර්ථ යථාර්ථයක් බවට පත්වන, ප්‍රීතිමත් ඊද් උල් අල්හා උත්සවයක් වේවා! යැයි සහෝදර ඉස්ලාම් බැතිමතුන් සියලුදෙනාට මම සුබ ප්‍රාර්ථනා කරමි.

කොවිඩ් -19 වසංගත තත්ත්වය හේතුවෙන් ප්‍රත්‍ය පහසුකම් නොලැබෙන විහාරස්ථාන සඳහා ප්‍රත්‍ය පහසුකම් සැළසීම

පවතින කොවිඩ් -19 වසංගත තත්ත්වය හමුවේ පනවා ඇති සංචරණ සීමා හේතුවෙන් ප්‍රත්‍ය පහසුකම් නොලබන බෞද්ධ විහාරස්ථාන සඳහා රු. 5000/- ක වටිනාකමින් යුත් වියළි සලාක මල්ලක් ලබාදීමේ වැඩසටහනක්  බුද්ධශාසන, ආගමික හා සංස්කෘතික කටයුතු අමාත්‍යාංශ මඟින් සංවිධානය කරන ලද අතර එම භාණ්ඩ මලු ලංකා සතොස ලිමිටඩ් ආයතනය මඟින් දිවයින පුරා පවතින ප්‍රත්‍ය පහසුකම් නොලැබෙන විහාරස්ථාන සඳහා මේ වන විට බෙදා හරිමින් පවතියි.

 

දැනට කොළඹ, ගම්පහ, කළුතර, කුරුණෑගල හා අනුරාධපුර යන දිස්ත්‍රික්ක සඳහා භාණ්ඩ මලු බෙදා දී ඇති අතර, II වන අදියර යටතේ ඉතිරි දිස්ත්‍රික්ක වල පහත වගුව පරිදි භාණ්ඩ මලු බෙදා හැරීමට නියමිතය‍.

                                                                  

අනු අංකය

දිස්ත්‍රික්ක

බඩු මලු ප්‍රමාණය

01.

ගාල්ල

233

02.

මාතර

135

03.

හම්බන්තොට

339

04.

මහනුවර

526

05.

මාතලේ

51

06.

නුවරඑළිය

156

07.

පොළොන්නරුව

72

08.

අම්පාර

261

09.

ත්‍රිකුණාමලය

55

10.

මඩකලපුව

14

11.

බදුල්ල

60

12.

මොණරාගල

55

13.

රත්නපුර

371

14.

කෑගල්ල

196

15.

පුත්තලම

405

                  එකතුව

2929

 

අභිනවයෙන් ඉදිකළ නවග්‍රහ මණ්ඩපය විවෘත කිරීම

2021.07.14 වන (හෙට දින) දින පෙරවරුවේ නාරාහේන්පිට අභයාරාම විහාරස්ථානයේ අභිනවයෙන් ඉදිකළ නවග්‍රහ මණ්ඩපය විවෘත කිරීම ගරු ජනාධිපති ගෝඨාභය රාජපක්ෂ මැතිතුමාගේ සහ ගරු අග්‍රාමාත්‍ය මහින්ද රාජපක්ෂ මැතිතුමාගේ සහභාගී හෙට පෙරවරුවේ සිදු කෙරේ.

 රටට පවත්නා නවග්‍රහ දෝෂ සහ කොවිඩ් 19 වසංගත තත්වයෙන් පීඩාවට පත්වූවන්ට  සෙත් පතා සතියක කාලයක් මෙහි නවග්‍රහ පූජාවක් පැවැත්වීමට කටයුතු යොදා ඇති බව  නාරාහේන්පිට අභයාරාමාධිපති පූජ්‍ය මුරුත්තෙට්ටුවේ ආනන්ද ස්වාමීන්වහන්සේ  අදහස් දක්වයි.

අග්‍රාමාත්‍යතුමා රුහුණු කතරගම මහා දේවාලයේ ඇසළ පෙරහර මංගල්‍යය නරඹයි

ඓතිහාසික රුහුණු කතරගම මහා දේවාලයේ ඇසළ පෙරහර මංගල්‍යය-2021ආරම්භක දිනය වූ ඊයේ (10) රාත්‍රියේ "මංගල පෙරහර" නැරඹීම සඳහා ගරු අග්‍රාමාත්‍ය  මහින්ද රාජපක්ෂ මහතා එක්ව සිටියේය.

කතරගම ඇසළ මංගල්‍යයේ ප්‍රධාන අංගයක් ලෙස වාර්ෂිකව පවත්වන පෙරහර මංගල්‍යය සුවිශේෂී සම්ප්‍රදායන් හා චාරිත්‍රවලට ප්‍රමුඛත්වය ලබාදෙමින් සංවිධානය වෙයි.

කොවිඩ්-19 වසංගත තත්ත්වය හේතුවෙන් මෙවර ඇසළ මහා පෙරහර මංගල්‍යය සෞඛ්‍ය මාර්ගෝපදේශයන්ට යටත්ව මහජන සහභාගීත්වයකින් තොරව සංවිධානය වේ.

මංගල පෙරහර පැවැත්වෙන අවස්ථාවට රුහුණු මාගම් පත්තුවේ ප්‍රධාන සංඝනායක කිරිවෙහෙර රජ මහ විහාරාධිපති ආචාර්ය කොබවක ධම්මින්ද නාහිමි සහ රුහුණු මාගම්පත්තුවේ ප්‍රධාන අධිකරණ සංඝනායක කපුගම සරණතිස්ස නාහිමි ඇතුළු මහා සංඝරත්නය ද වැඩම කළ වදාළහ.

මෙම අවස්ථාවට අග්‍රාමාත්‍ය ආර්යා ශිරන්ති රාජපක්ෂ මහත්මිය, රාජ්‍ය අමාත්‍ය ශෂීන්ද්‍ර රාජපක්ෂ, රුහුණු මහා කතරගම දේවාලයේ බස්නායක නිලමේ ඩිශාන් වික්‍රමරත්න ගුණසේකර, කතරගම ප්‍රාදේශිය සභාවේ සභාපති චානක අමිල් රංගන මහත්වරු ඇතුළු පිරිසක් එක්ව සිටියහ.

අග්‍රාමාත්‍යතුමා කතරගම කිරිවෙහෙර ආගමික වතාවත්වල නිරතවෙයි

කතරගම කිරිවෙහෙර වැඳ පුදා ගත් ගරු අග්‍රාමාත්‍ය මහින්ද රාජපක්ෂ මහතා ඊයේ (09) පස්වරුවේ එහි ආගමික වතාවත්වල නිරත වූයේය.

රුහුණු මාගම් පත්තුවේ ප්‍රධාන සංඝනායක කිරිවෙහෙර රජ මහ විහාරාධිපති ආචාර්ය කොබවක ධම්මින්ද නාහිමියන්ගේ සුව දුක් විමසා බැලූ අග්‍රාමාත්‍යතුමා පළමුව උන්වහන්සේගෙන් ආශිර්වාද ලබා ගත්තේය.

අග්‍රාමාත්‍යතුමා සහ අග්‍රාමාත්‍ය ආර්යා ශිරන්ති රාජපක්ෂ මහත්මිය ඇතුළු පිරිස කිරිවෙහෙර ආගමික වතාවත්වල නිරතවූයේ ඉන් අනතුරුවය.

කොබවක ධම්මින්ද නාහිමියන් ඇතුළු මහා සංඝරත්නය කිරිවෙහෙර අභියස දී සෙත් පිරිත් සජ්ජායනා කරමින් අග්‍රාමාත්‍යතුමාට ආශිර්වාද පළ කළහ.

මෙම ආගමික වතාවත් සඳහා රාජ්‍ය අමාත්‍ය ශෂීන්ද්‍ර රාජපක්ෂ, රුහුණු මහා කතරගම දේවාලයේ බස්නායක නිලමේ ඩිශාන් වික්‍රමරත්න ගුණසේකර, හිටපු ඌව පළාත් සභා මන්ත්‍රී විමල් ගලගම ආරච්චි, කතරගම ප්‍රාදේශිය සභාවේ සභාපති චානක අමිල් රංගන මහත්වරු ඇතුළු ප්‍රාදේශිය දේශපාලඥයෝ පිරිසක් එක්ව සිටියහ.

Latest Video